Berrio-Otxoa eguna, herriko patroiaren eguna, ospatzen dabiltza gaur Elorrion. Santu eta Bizkaiko zaindarikidearen omenezko ospakizunak 12:00etan hasi dituzte, basilikan, meza nagusiaz. Aurretik, udal ordezkariek udaletxetik basilikara arteko bidea txistulariekin zeharkatu dute.
13:00etan, Berrio-Otxoa kalean luntxa egingo dute, trikitilari eta bertsolariek girotuta. Arratsaldean, berriz, Berrio-Otxoa abesbatzak Santa Anako kaperan abestuko du.
Bestalde, herritar talde batek dispertsioa amaitzea eskatzeko elkarretaratzea egin du herriko plazan.