Bikote bakoitzak hiru pieza eskainiko ditu txapelketaren barruan: trikitia, porrusalda, eta pot-pourria. Sariak banatzerakoan, piezen originaltasuna, kide bien bat etortzea eta dantzagarritasuna hartuko ditu kontutan epaimahaiak, besteak beste. Txapelak eta 250 euroko ordainsaria jasoko dituzte lehenengo sarituek, 200 euroko saria bigarrenek, 150 eurokoa hirugarrenek eta 80 eurokoa gainontzeko hiru sailkatuek.
Alaitz Udalleta eta Aiala Etxabe, Julen Alonso eta Eneritz Aulestia, Josune Arakistain eta Alaitz Eskudero, Naiara Mancisidor eta Naia Aguirregabiria, Larraitz Etxarte eta Olatz Leturiaga, eta Paul Eizmendi eta Andrea Beobide bikoteak ariko dira Elorrioko I. Trikitilari Gazteen Txapelketan.
“Jaietan edo askotariko ekitaldietan trikiti doinua atzealdean entzutera ohituta gaude, baina ez dugu ezagutzen jotzen eta kantatzen gazte hauek duten trebetasuna”, adierazi du antolakuntzan jardun den Juan Luis Elorzak. Azaldu duenez, ezagutza hori bultzatzeko antolatu dute txapelketa, gutxinaka, Durangaldeko hainbat herritako tradizio trikitilaria berreskuratzeko.
Oraindik txapelketan parte hartzeko gazteak izanagatik, badago Elorrioko musika eskolan trikitia ikasten duen 8-9 urteko elorriarrik. Gaizka Peñafiel trikitilari lezamarra dute irakasle musikari gazte horiek.
