Blues doinuak eskainiko dituzte hamasei bandakidek bihar, eta domekan eta datorren barikuan antzerkia egongo da.
Big Band bat da The Travellin Brothers, hamasei musikarik osaturiko taldea. Bihar, 22:30ean, herriko plazan eskainiko dute emanaldia, Musikaire jaialdiaren barruan. Soka, haize eta perkusio instrumentuak eta ahots jokoak baliatuz blues doinuak sortzen dituzte taldekideek. Leioan sortu zuten taldea, 2003an, eta 2010etik hona dihardute Big Band formatu handian.
Dantza eta akrobaziak
Domekan, 22:30ean, Natura... principio y fin antzezlana eskainiko dute plazan. Teatraporen obra da, 80ko hamarkadan Extremaduran sortu zuten taldearena. Ekologiaren aldeko mezua zabalduko dute Elorrion, dantzaren, akrobazien, musikaren eta estetika bereziaren bitartez.
Datorren barikuan ere antzerkiarekin du hitzordua Musikairek: Morboriaren El rey y el bufon antzezlana izango da ikusgai.