Larunbatean jai usaina antzematen zen Eleizalden. Txaranga, ohi baino jende gehiago harmailetan… Nabari zen egun handia izan zitekeela Elorrioko taldearentzat. Bost jardunaldiren faltan Lehen Erregionalerako txartela segurtatu zezakeen. Elorriok ez zuen partidu ona jokatu, baina puntu bakarra nahikoa izan eta huraxe batu zuten Artibai azken aurreko sailkatuaren aurka (1-1).Azken urteetan igoeraren atarian geratu da Elorrio. Dena alde zuela azken unean eskuetatik ihes egin izan dio altxor preziatuak. Aurten jokalariek eta talde teknikoak sinergia irabaztailea sortu eta sustatu dute eta txapeldun handien antzera lortu du igoera. Datorren urtean Zalduaren eta Iurretakoren maila berean jokatuko du.
