Diskoan jasotako kantak ez ezik, gustuko dituzteen taldeen bertsioak ere egingo dituzte biharko Ateneoko kontzertuan; The Doors, Mano Negra, Queens Of The Stone Age, Corrosion of Conformity edo Sufjan Stevens bezalakoenak, esate baterako.
Durango eta Ondarroako taldekideak batuta sortutako taldea da Tunnel 483, eta gaur egun taldea osatzen duten lagunek elkarrekin urte bi eginda eman zuten uztailean grabaziorako pausoa.
Hasieran formatu akustikoan hasi zirela abestiak diote, eta taldea handituz joan ahala –hasierako bi gitarrei bateria eta kontrabaxua gehituta– soinua apur bat “gogortu” egin dutela. Hala ere, oinarri akustiko hori mantentzen dute abesti guztietan. Euren berbetan, “musika iluna eta psikotropikoa, trankila, lasai entzuteko moduakoa” egiten omen dute Tunnel 483koek. Umoretsu diote, “dutxan ipini eta Tom Jones-enak egiteko aproposa” dela euren musika. Dutxako uretan barik, Elorrioko Ateneoan entzutekoa da gonbita.