"Durangoko Azokako egunetan giro berezia sortzen da Palentinoan. Kultura munduko fauna hemen batzen da, eta giro berezia sortzen da. Pentsatu genuen polita izan zitekeela kantu bat hemen girotzea eta gure eszenarentzako kantu bat sortzea", azaldu du abestiaren jatorria Gorka Urbizuk.
Peiremansek gaur bertan sareratu du bideoklipa, eta ANBOTOk making off deritzonaren lagin txiki hau publikatu du. Izan ere, hedabide honetako kazetariak filmaketaren lekuko izatera hurbildu ziren Palentinora, urriaren 19an, eta hango giroa jaso zuten. Euskal Herriko eszenako sortzaileak jo eta ke harrapatu genituen plano eta sekuentzia artean grabaketan parte hartzen: Itziar Ituño, Edurne Azkarate, Flakofonki, Kiliki, Joseba Sarrionandia, Izaro, Amets Aranguren, Gotzon Barandiaran eta Oier Guillan, besteak beste. Bideoklipa Arriguri ekoiztetxeak filmatu du.
Argitalpen berri bi
Peiremans+ taldea indartsu dator Durangoko Azokara. Batetik, LP batean batu dituzte beren lehenengo diskoko eta bigarren diskoko kantuak, eta argitalpen bateratu hori biniloan zein CDan dago honezkero, salgai. Bestetik, disko berri bat plazaratuko dute, hirugarrena. Bost kantu izango ditu, tartean, Durangoko Palentinoan. Binilo txiki batek eta CD batek osatuko dute argitalpen hori. Hortik aurrera, taldeak zuzenekoetan ipiniko ditu indarrak: "Emanaldi ugari dugu aurretik, eta berotze lanetarako hiru gaztetxetan egingo ditugu emanaldiak", iragarri du Imanol Ubedak.
