Durangoko Udalak publikoki salatu ditu ezezagunek Tabirako igerilekuetan egindako ekintza bandalikoak. Ezezagunek kalte material ugari eragin dute bart, baina gertakaririk larriena igerileku handian izan da: baten batek kaka egin du ontzi barruan. Hori dela eta, udala instalazioa ixtera behartuta egon da gaur, osasun-protokoloak aktibatu eta desinfekzio lan sakonak egiteko.
Bandalismoak arrasto nabarmenak utzi ditu igerileku esparru osoan. Erasotzaileek harrerako kristala eta pertsiana hautsi dituzte, sarbideak behartu dituzte eta mantentze-zerbitzuko telefono mugikor bat lapurtu dute. Tabernan ere sartu dira, eta han ere kalteak eragin dituzte: hozkailuak zabalik utzi dituzte, eta horregatik taberna ere itxita egongo da gaur.
Udalak "irmo" gaitzetsi ditu ekintzak, "herritar guztiei eta udal-zerbitzu publiko baten funtzionamendu egokiari" kalte egiten dietelako. Era berean, neurriak hartuko ditu instalazioen segurtasuna indartzeko eta antzeko gertaerak berriro ere ez gertatzeko.
