Durangok sorkuntzarekin duen konpromisoa erakusten du programa honek, Mireia Elkoroiribe alkatearen berbetan. "Proiektu honek sortzaileak, agente kulturalak, erakundeak, enpresariak eta ekintzaileak batzen ditu, Durangon bertan kultur eta musika ekosistema bat sortzeko", azaldu du. Iñigo Egitegi Musika Bulegoan Musik(H)abian proiektuaren arduradunak ekintzailetasuna nabarmendu du. "Musika-sektorearen behar erreal bati erantzuteko sortu da. Musikan talentua eta sormena ezinbestekoak dira, baina horiek bakarrik ez dira nahikoa proiektu bat sendotzeko. Musik(H)abianen helburua da ekintzaileei negozio-eredua definitzeko, erabaki estrategikoak hartzeko eta epe luzera iraunkorrak izango diren proiektuak garatzeko behar dituzten tresnak eta laguntza eskaintzea", gehitu du.
Honenbestez, lau proiektu hautatuei formakuntza saioak eskainiko zaizkie urriaren 14tik abenduaren 16ra; saio horiek Durangon eta Errenterian egingo dira. Gainera, proiektu bakoitzak 1.500 euroko laguntza ekonomikoa jasoko du, parte hartzea errazteko. "Oso garrantzitsua da ekintzaileek prozesu hori bakarrik ez egitea. Programak prestakuntza, banakako mentoretza eta sektoreko profesionalekin harremanak izateko aukera uztartzen ditu, parte-hartzaileek beren proiektua ikuspegi integral batetik landu dezaten eta Euskal Herriko musika ekosisteman txertatzeko aukera izan dezaten", amaitu du Egitegik.