Stop Bide Indarkeriak 3.000 durangarrengana helarazi du bide-segurtasunari buruzko kontzientzia

Stop Bide Indarkeriak ikasturte honetako balantzea egin du. Elkarteak Mugikortasun Seguruaren Programa landu du Durangoko Udalarentzat, eta ondorioztatu du 2025- 2026 ikasturtean, egitasmoz egitasmo, 3.000 herritarren artera zabaldu duela bide segurtasunari buruzko sentsibilizazioa. Arrakasta hori datuetan islatu dela esan du elkarteak: Durangoko ikastetxe guztietako 2.730 ikaslek parte hartu dute bide-hezkuntzako saioetan. Gainera, adinekoei, aniztasun funtzionala duten pertsonei eta beste hainbat kolektibori zuzendutako tailerrak ere antolatu dituzte.

Ikasturte honetako berritasunetako bat Ihes-gela izan da, Durangoko Institutuko ikasleekin estreinatu dutena. Jokoak trafiko seinaleak identifikatzeko eta arrisku egoerak zelan konpondu ikasteko balio izan du, era ludikoan. Elkarteak esan duenez, egitasmoak harrera "bikaina" izan du, "eta agerian utzi du metodologia berritzaileek bide-hezkuntza belaunaldi berriei hurbiltzeko duten gaitasuna".

Patinete elektrikoak eta bizikidetza

Stop Bide Indarkeriaren beste ardatz nagusietako bat patinete elektrikoen erabilera arduratsua bultzatzea izan da. Elkarteak Arduraz gidatu informazio-liburuxka banatu du herritarren artean, Mugikortasun Pertsonaleko Ibilgailuen (MPI) udal-ordenantza berria ezagutarazteko. Helburua oinezkoen eta patinete-erabiltzaileen arteko bizikidetza hobetzea eta espazio publikoan errespetua sustatzea izan da, kontuan hartuta gaiak kezka berezia sortzen duela adinekoengan.