Durangoko Udalak ia 159.000 euroko diru-poltsa du lotuta Zumar kaleko erdibitzailean dagoen zuhaiztia berrantolatzeko. Arboladietan espezializatutako teknikariek landutako proiektu integrala hartuko dute oinarri moduan lanak garatzeko. Hartara, egoera txarrean dauden 24 zuhaitz moztu egingo dituzte eta 46 arbola berri landatuko dituzte, "hazkunde osasungarria eta jasangarria bermatzeko zehaztutako irizpide teknikoei jarraituz". Helburua da "6 urteko epean tamaina ertain-handiko aleak lortzea, kaleari arbola helduek ematen dituzten onurak eskaintzeko, hala nola itzala, freskotasuna eta ingurumenaren hobekuntza".
Esku-hartzea Zumar kaleko erdibitzailean eta inguruko bi berdeguneetan egingo da, ia 159.000 euroko aurrekontuagaz. "Segurtasuna eta hiri-ingurunea hobetzea ez ezik, jasangarritasun eta babes klimatikoaren helburu orokorrak betetzea lortu gura da, klima aldaketaren aurkako borroka indartuz eta herrian babes naturaleko gune berriak sortuz ", udal ordezkariek jakitera eman dutenez.