Irabazleak, hamar abestiko LP bat grabatzeko bost eguneko saria lortuko du (hamar nahasketak eta masterizaziorako egun bat barne); bigarrenak bost abestiko EPa grabatzeko hiru egunekoa; Durangaldeko banda onenak San Fausto jaietan jotzeko aukera, 600 euro eta single bat grabatzeko aukera izango du; metal talde onenaren saria jasotzen duenak, ostera, Koba Live jaialdiaren 2027ko edizioan parte hartuko du. Eszenaratze onenaren eta soinurik onenaren sariak irabazten dituzten taldeek, single baten grabazio eta bideoklip baten ekoizpena, eta Txirula saria eramango dituzte, hurrenez hurren.
"Joan den maiatzean hasi ondoren, txapelketa aste erabakigarrietan murgilduko da orain sorkuntza artistikoa bultzatzeko eta Euskadiko erakusleiho musikalaren barruan bere lekua izateko asmoz", azaldu du udalak ohar baten bidez. Sektoreko profesionalek eta udal-teknikariek osatutako epaimahaiak hautatutako 30 lehiakideetako batzuk euren proposamena aurkezteko aukera izan dute jada, besteak beste, Julen Burgos, Scusy Boys, Etorkizun beltza edota Shut you on (SYO) taldeek.