Durangoko Udaleko Turismo Sailak Durangoko nire txokorik gogokoena argazki-lehiaketaren bigarren edizioa ipini du martxan. Iazko arrakasta ikusita —169 argazki aurkeztu ziren—, aurten ere Instagram bidez parte hartzera deitu dute. Parte-hartzaileek uztailaren 15era arteko epea dute Durangoko argazkiak @durangobizkaia Instagram kontua aipatuta sareratzeko. Era berean, lehiaketarako propio prestaturiko traolak erabili beharko dituzte, adibidez, #DurangokoTxokorikPolitena2026). Horrez gainera, inprimaki digitala bete beharko dute parte hartzaileek.
Sariak
Lehiaketak tokiko bi sari banatuko ditu: 200 eurokoa lehenengoarentzat eta 100 eurokoa bigarrenarentzat. Gainera, irudi irabazlea Durangoko promozio-materialetan (postaletan, posterretan...) erabiliko dute, eta argazkiak Durango ordezkatuko du Espainiako estatuko Nire txokorik gogokoena proiektuaren azken fasean. Bertan, 500 eurora arteko sariak eskuratu ahalko dira. Jesica Ruiz Turismo zinegotziak herritar guztiak animatu ditu parte hartzera.
