Durangoko Udalak parke berri bat ipiniko du San Roken. Aisialdiari eta kirolari begirako eremua izango da, eta Bustintza kalearen ondoan egokituko dute, auzoko aparkalekuaren ondoan. Eremuak aire zabaleko frontoi txiki bat, saskibaloi kantxa, berdegunea eta atsedenlekuak izango ditu, eta 375.000 euroko inbertsioagaz egingo dituzte lanak, hainbat urtetako finantzaketagaz. Diseinuari dagokionez, zuhaitz autoktonoak lehenetsiko dituzte, eta zoladura iragazgarria ipiniko dute elementuen oinarrian. Bestalde, proiektua parte hartze bidezko aurrekontuen emaitza dela gogorarazi du udalak.
Mireia Elkoroiribe alkateak eta Iker Txertudi kirol zinegotziak asteon aurkeztu dute proiektua, Otamotzeneko auzogunean. Alkatearen berbetan, Bustintza kalea "espazio ireki eta moldakorra" izango da parke berriari eskerrak, "herritarren ongizatea eta bizikidetza sustatzeko" eremua.
