Parte hartzea gura dutenek, apirilaren 13ra arte dute aukera izena emateko. Hamargarren edizioan aurreko urteetan erabilitako gaien "birpasa" egingo dutela iragarri dute antolatzaileek. Besteak beste, Sarri, bidaia, lurra, askatasuna edo umorea izango dira gaietako batzuk. Ohi bezala, gainera, musikari, bertsolari, antzerkigile, dantzari eta abarrek girotuko dute irakurraldia.
Aurreko urteetan lez, Imanol Larrinaga Larrañagak sortu du ekimenerako kartela.
Apirilaren 16an, dokumental emanaldia
Gerediaga elkarteak eta Hitzez eta Ahotsezek elkarlanean antolatu dute aurtengo zikloaren lehenengo hitzordua. Apirilaren 16an Lourdes Iriondo. Ez gera alferrik pasako dokumentala eskainiko dute Durangoko Zugaza zineman. Pelikularen ostean, solasaldia egongo da Inge Mendioroz Ibañez zuzendariagaz eta Igoia Garzes Aldazabal gidoilariagaz. Sarrerak hiru eurotan daude salgai.