'Piranesi. Erroma amestua' erakusketa bost gaitan banatu dute: Arkeologia eta dokumentua; monumentua eta boterea; Erromaren asmakuntza; Piranesi eta idazlea; azkenik, diseinua, apaindura eta irudimena. "Ikusi ahalko diren serieen artean, Le Antichità Romane, Il Campo Marzio dell' Antica Roma, Trofei o sia Magnifica Colonna Coclide eta Diverse maniere di d' addornare i cammini bezalako piezak daude", azaldu du Garazi Arrizabalaga museoko zuzendariak. "Piranesi oso pertsona eta ezaguna da Erromaren iruditegian, eta bera nor zen eta hiriari egindako ekarpena erakustea gura dau erakusketa honen bitartez". José Ignacio Olaveren laguntza ere eskertu du museoko zuzendariak. "Olaveri esker, Pinaresiren oinordeen lanak ere ikusgai egongo dira; adibidez, Laura Pinaresiren lan bat ikusgai egongo da, eta hori ez da erraza", gehitu du. Honakoa ez da Olavek Durangoko Arte eta Historia museoagaz lan egiten duen lehen biderra. Aurretik, 'Editore mozorrotua' eta Albrecht Duerer artistaren grabatu originalen erakusketan ere parte hartu zuen. "Duela 40 urte inguru agertu zen Piranesi nire bizitzan. Uste dut bere lanak bat datozela eskualde honekin, baita Piranesiren alde arkitekto eta arkeologoan ere", azaldu du prentsaurrekoan. "Gainera, izugarri gustatu zait nola geratu den erakusketa aretoa".
Giovanni Battista Piranesi (1720-1778) XVIII. mendeko funtsezko artista italiarra izan zen. Bere grabatuen bidez antzinako Erroma ikuspegi monumental, kritiko eta irudimentsu batetik berrasmatu zuen.
Piranesiren lanak ikusteko aukera paregabea dela nabarmendu du Arrizabalagak, izan ere, Londres, Erroma, Madril edota Chicago bezalako hirietan ikusi ahal izan dira. "Orain Durangon daude lan hauek". Ate irekiera ekitaldian Nerea Barrenetxea eta Ane Artetxe musikariek arpa emanaldia eskainiko dute. Ohi bezala, bisita gidatuak ere eskainiko dituzte museoan.