Eixu artisauen elkarteak aukera apropos-aproposa eskainiko die herritarrei, Gabonen atariko azken erosketak egiteko. Elkarteko dozena bat artisau baino gehiago hiru egunez egongo dira, abenduaren 21etik 23ra, Durangoko Andre Marian. Aurkene Pagalday elkarteko kideak Durangoko Udaleko aurkezpenean azaldu zuenez, "diziplina askotariko artisauak" batuko dira, "beren sorkuntzak pasio handiarekin sortu dituztenak", guztiak ere. Horien artean egongo dira egurrezko apaingarriak, bitxiak, papergintza, zeramika, kandelak, arropa, poltsak, motxilak eta osagarriak.
Ipuin kontalariak
Azokari bestelako tonua emateko asmoz, Eixuren eskutik ipuin kontalariak egongo dira elizpean. Oihana Etxegibelek saio bi eskainiko ditu. Abenduaren 22an izango da bata; 23an, bestea. 18:00etan izango dira saio biak.
Gainerakoan, azokaren ordutegia honako hau izango da:
- Abenduaren 21a: 10:00 - 20:00
- Abenduaren 22a: 16:00 - 20:00
- Abenduaren 23a: 16:00 - 20:00