[ARGAZKI GALERIA]: Durangoko Energia Komunitatea aurkeztu dute, eredu energetiko "justu, jasangarri eta tokikoa" helburu

Atzo, Durangoko Energia Komunitatea aurkeztu zuten San Agustin kulturgunean, sistema energetiko "justuago eta jasangarriagoa" lortzea helburu. Komunitatea urte biko lanaren emaitza da, Piztu Durango prozesuaren emaitza. Bidean, ehun durangarrek baino gehiagok parte hartu dute komunitatea eratzeko prestaketa jardunaldietan. 

Irabazi asmorik bakoa

Parte-hartze prozesu horren ondorio nagusia forma juridikoa erabakitzea izan da: Durangokoa irabazi asmorik bako kooperatiba mistoa izango da. Hori horrela, bazkideak ez dira energia kontsumitzaile hutsak izango. Energia berriztagarria ekoizteko eta kudeatzeko ahalmena izango dute. Egitasmoaren sustatzaileek proiektuarekin bat egiteko 10 arrazoi nagusi nabarmendu dituzte. Horien artean daude herritarren ahalduntzea, karbono dioxidoaren emisioak murriztea, faktura elektrikoan aurreztea eta tokiko ekonomia sustatzea.

Epe laburrerako proiektuak:

Komunitateak honako mugarri hauek ezarri ditu datorren urteari begira:

1. Autokontsumo partekatua: 50 eta 100 kW bitarteko instalazio fotovoltaikoa ipini gura dute martxan.

2. Formakuntza: Jasangarritasunaren inguruko saioak eskainiko dituzte herriko ikastetxeetan, DBH 4. mailako ikasleengandik hasita.

3. Aholkularitza: Etxeko faktura elektrikoa ulertu eta optimizatzeko tailerrak antolatuko dituzte Goienerrekin batera. Gainera, Durangon energia-aholkularitzarako bulego fisiko bat irekitzeko aukera aztertzen dabiltza.

Bazkidetza kanpaina zabalik

Kooperatiba formalki eratzeko, bazkidetza kanpaina abiatu dute. Interesa duten herritarrek 50 euroko ekarpena egin beharko dute (diru hori itzuli egingo dute etorkizunean bazkide izateari utzi nahi izanez gero). Izena emateko edo informazio gehiago jasotzeko, herritarrek durangoenergia.eus webgunea dute eskura.