Nafarroako Gobernuak eman du berria: Epifanio Osoro Ikobaltzeta anarkista durangarraren gorpuzkiak topatu dituzte Berriozarko hilerrian. DNA Bankuak identifikatu ditu arrastook, eta durangarra da, hain zuzen ere, 2022an Berriozarko hilerrian egindako desobiraketen harira identifikatutako bosgarren presoa. Nafarroako Gobernuak zehaztu duenez, Osoro frankistek preso hartuta egon zen San Kristobalgo gotorlekuan, Ezkaba mendian, eta beste 21 presok osaturiko talde bateko kidea izan zen. 1936ko azaroaren 1ean erail zuten, frankisten altxamendu betean, epaiketarik barik.
Anarkista durangarrak 22 urte zituen hil zutenean. Mekanikaria zen lanbidez, eta ezkongabea egoera zibilari zegokionez. Berarekin batera hil zituzten gehienak bezala, CNT sindikatuko militantea zen.
Nafarroako Gobernuak jakinarazi duenez, gorpuzkiak identifikatzeko prozesuan paper nabarmena jokatu dute Jimi Jimenez eta Elena Aliaga ikerlariek.