Jarki antolakundeak agerraldia egin du gaur Durangon, manifestazio baten berri emateko: abenduaren 6an, Durangoko kaleetan mobilizatzera deitu dute, Frantziako zein Espainiako estatuek "inposatutako instituzio, legedia eta erregimenekiko apurketa beharrezkoa" dela aldarrikatzeko. Manifestazioa Espainiako konstituzioaren egunean egingo dute, hain zuzen ere. Antolakundeak adierazi duenez, estatu bietako konstituzioek "azpiratuta" mantentzen dituzte Euskal Herriko langileak. Hori dela eta, "apurketa eta konfrontazioa" ipini dituzte estatu bien "boterearen eta neurrigabekeriaren amaiera" eta "Euskal Herriko langile klasearen proiektu politikoaren gauzapena" egikaritzeko. Era berean, konstituzio biek Euskal Herria tantaz tanta "disolbatu" gura dutela gaineratu dute, gaur egun Euskal Herriak bizi dituen "zapalkuntzak eta injustiziak konstituzioetatik eratorritako errealitatearen islaren gainean eraikiak baitira".
Mobilizazioa 19:00etan izango da.