Gatibu Durangaldean ikusteko azken aukera

Joan zen asteburu luzea atzean utzita, durangarrek zoramenerako egun gehiago dute aurretik. Orain ere, makina bat ekitaldi, animazio eta musika egongo da herriko kaleetan. Baina, denen artean, zalantzarik barik, Gatiburen kontzertuak batuko du jenderik gehien. Alex Sardui eta bere mutilak Ezkurdiko eszenatokira igoko dira barikuan, hilak 17, 23:00etan, durangarren eta bisitarien gozamenerako. Eta eguraldi iragarpenak onak diren arren, Euritan dantzan ibiliko dira, Bang-bang txik-txiki bang-bang. Maitale ezagutu berriek Musturrek sartunde ikusiko dute kontzertua beharbada, Bixotza suten. Eta parrandazalerik alprojenak Besoak zabalik ibiliko dira Bizitzeko gogoa eztarria urratu beharrean abesten, Eztanda egin arte. Eta horren ondoren, atsedena, agurra. Eta malkoren bat edo beste ere bai, talde gernikarra bere agur biran murgilduta dagoelako, eta barikukoa izango delako, hain zuzen ere, Gatibu eskualdean zuzen-zuzenean ikusi ahal izateko azken aukera. Behin Ezkurdi agurtuta, Nafarroa Behereko txoko txiki horretara joango dira, Urepelera, eta Madril eta Bartzelona bisitatu ondoren egingo dute azken agurra BECen, hiru emanaldigaz. Gatibuk era horretan agurtuko du bere 25 urteko ibilbidea, zale guztiekin batera, Aske maitte betean eta Lorak eskeintzen.