Urte bi dira Aramotz, San Roke eta Herria Auzo Elkartearen bueltako bizilagun batzuek tokiko produktuekin elikatzeko ALE San Roke kontsumo taldea eratu zutenetik. Baserritarren eta auzotarren arteko aliantzari eskerrak, bigarrenek lehenengoen berdura, esneki, ogi eta arrautzak jasotzen dituzte astero-astero, hutsik egin barik.
Gaur egun, hamar familiak eta lau baserritar ekoizlek osatzen dute taldea, baina egitasmoa auzoetako herritar gehiagorengana irisarazi gura dute aurrerantzean: "Izan ere, kontsumo taldeari esker, Durangaldeko baserritarren elikagaiak lortzen ditugu: Gertuko produktuak dira, kalitatezkoak eta ekologikoak. Hori dela eta, kontsumo taldea handitu eta elikadura ohitura hori auzotar gehiagorengana ailegatzea gura dugu", adierazi dute egitasmoko kideek. Helburu horretarako, hain zuzen ere, kontsumo taldearen aurkezpen publikoa egingo dute. Ekitaldia eguenean izango da, hilak 25, Otamotzena auzogunean, 18:30ean.
