Urteroko ohiturari eutsiz, Mugarra Triatloi Taldeak Triatloi Txikia antolatu du zapatu honetan Durangon. 2017tik aurrera jaiotako prebenjaminetatik hasi eta haur-kategoriara (2011-2012) artekoei bideratutako ekimena da eta umeen artean kirol honekiko zaletasuna piztea da ekimenaren helburua. MugarraTTk triatloi eskola bat du 60 ume baino gehiagorekin.
Tabira, erdigune
Tabirako igerilekuak izango dira ekimenaren erdigunea. Hantxe egingo dute igerian eta handik irtengo dira korrika eta bizikletan egin beharreko ibilbideak. Umeak adinka banatuko dituzte. Prebenjaminen lasterketa 10:30ean hasiko da, benjaminena 10:45ean, kimuena 11:10ean eta haur-kategoriakoa 11:30ean. Bizikletako tartea igerilekutik Tabirako ermitara arteko zirkuitu bat izango da eta, korrika igerileku inguruan ibiliko dira.
Izen-ematea bi modutara egin daiteke: internetez www.rockthesport.com webgunean eta egunean bertan, Tabiran.