Garazi Arrizabalaga Durangoko Arte eta Historia museoko zuzendariak Beorlegi eta bere lana belaunaldi gazteagoei hurbiltzearen garrantzia azpimarratu du. "Bere garaiarekiko konprometitua zen Beorlegi, eta konpromiso hori erakusten zuen bere lanaren bidez; hainbat lan egiteaz gainera, talde desberdinen sorkuntzan ere parte hartu zuen. Izandako eraginagaz batera, garrantzitsua da informazio hori gazteagoei helaraztea". Horretarako, ohi bezala, tailerrak antolatu dituzte, eta Lopez-Diez berak bisita gidatua eskainiko du maiatzaren 8an.
2008an hil zen Fernando Beorlegi artista, gaixotasun luze baten ondorioz. Hainbeste urte eta gero, artistaren lanak erakusketa batean batzeagaz eta erakutsi ahal izateagaz pozik agertu da Mikel Beorlegi semea. "Obsesioa zuen marrazteagaz eta lan egiteagaz; albisteak irakurtzen zituen, zirriborroetan jaso, eta hori abiapuntu hartuta, artelanak sortzen zituen. Hortik, bere lana, bere mundua, bizi zuen momentuagaz lotuta egotea". Guztira, 30 lan inguru egongo dira ikusgai ekainaren 1era bitartean. "Nire aita hemen egongo balitz, gustatuko litzaioke bisitariek bere lanak ikustea, hausnarketa propioak egitea, eta ostean, horietaz berba egitea. Beraz, lasai etortzeko, begiratzeko eta gozatzeko", gonbidatu ditu herritarrak erakusketara Mikel Beorlegik. "Durangorentzat harro egoteko modukoa da Fernando Beorlegiren lana berriro hartzea, haren ibilbideak arrasto sakona utzi baitu euskal arte garaikidean", adierazi du Paule Sanchez kultura zinegotziak.