Durangoko Ezkurdi Jai Alai pilotalekuak Euskal Herriko One Wall irekia hartuko du asteburu honetan. Euro1-Wall erakundearen aterkipean eta Arratiako Rebotean OneWall klubaren (ROWK) ekimenari esker antolatuko da.
Euskal Herriak tamaina horretako txapelketa bat hartzen duen lehenengo aldia izango da. Orain arte, ROWK klubak euskal pilotariekin antolatu izan ditu irekiak; inoiz nazioartekoren bat ere bai, baina atzerriko pilotariei parte hartzeko gonbita luzatuta. Kasu honetan, irekia Euro1-Wall erakundeko zirkuituaren barruan dagoenez, pilotariak ranking-erako puntu bila etorriko dira Durangora.
Guztira 46 pilotarik parte hartuko dute. Tartean, Ingalaterra, Herbehere, Irlanda eta Frantziako pilotariak daude; baita Ingalaterran bizi diren Hong Kong-eko pilotari bi ere. Durangaldeko pilotariak ere ariko dira, hala nola, Ainhoa Ruiz de Infante otxandiarra, Egoitz Amantegi abadiñarra eta Lier Arrien zornotzarra.
Txapelketa buruz buru eta binaka jokatuko da. Zapatuan buruz buru ariko dira 10:00etatik aurrera. Finalak 17:00etan hasiko dira. Domekan, 10:00etan, binakako txapelketaren txanda izango da. Finalak 15:00etan jokatuko dira. Finalak youtube bidez zuzenean eskainiko dituzte: www.youtube.com/@rowkonewall
Ezker horma frontis bihurtuko dute
OneWall-eko joko eremua edo kantxa gainerako modalitateetakoa baino txikiagoa da: sei metro zabal eta hamar metro luze ditu. Frontisak bost metroko garaiera du. Horrela, Durangoko pilotalekuko ezker horma frontis moduan erabilita, lau kantxa sortuko dituzte.
Txaparik ez dagoela eta fronteniseko pilotekin jokatzen dutela dira modalitate honetako beste ezaugarri kurioso bi.
Urte eta erdi OneWalla sustatzen
Rebotean OneWall kluba 2023 urte amaieran sortu zuten Arratian. Modalitate honen inguruan Euskal Herrian sortutako "lehenengoa" izan zen, klubeko kideetako bat den Lur Ziarrustaren esanetan. Orduan, OneWalla ez zegoen modalitate ofizial moduan onartuta Euskadiko Euskal Pilota Federakuntzan. Klubetik egindako gestioari esker, gaur egun onartuta dago.
Federazioak Euskal Herriko txapelketa antolatu zuen iazko abenduan, Lekeition. Emakumeetan Agirre-Larrarte bikotea geratu zen txapeldun eta gizonetan Beldarrain-Zapiko bikotea. Eskualdeko pilotari bik brontzezko dominak irabazi zituzten: Ainhoa Ruiz de Infantek Garairekin bikotea osatuz eta Egoitz Amantegik Arrizabalagarekin bikotea osatuz.
Garai eta Ruiz de Infante brontzezko dominarekin (Instagram: rowk.pkk)
Egoitz Amantegi eta Arrizabalaga brontzezko dominarekin (Instagram: rowk.pkk)