Durangoko EH Bilduk "paralisitik ateratzeko" eskatu dio EAJri, azken horrek "bi urteetan" hirigintza arloko "ezer" proposatu ez duelakoan. "EAJk proiektu batzuk bereak balira bezala saldu nahi izan dituen arren, gauzatze bidean zeudenak amaitu besterik ez ditu egin", kritikatu du koalizioak, eta honako adibide hauek zerrendatu ditu, besteak beste; "Antso Estegizen lehenengo fasea, Urki-Hegoalde irekitzea, Andra Mariko elizpea berritzea, edo Landako Eskolan eta Landako Gunean eguzki-plakak ipintzea".
"Komun publiko bi jartzeaz eta udaltzainentzat Taser pistolak ezartzeaz gainera, EAJk ez du ezer proposatu hirigintza arloa gobernatzen daramatzan bi urteetan. Bestalde, Platerueneko berrikuntza, Kirolene berria edo Tabirako igerilekuetako aldagela berriak bezalako promesa guztiak ez dira inolako ibilbiderik izaten ari", esan dute. 2024ko likidazioaren arabera, iazko aurrekontuetan jasotako inbertsioen % 60 "ez zen gauzatu 2024ko ekitaldian", EH Bilduk dioenez. Era berean, aurreko legegintzaldiko proiektu batzuk "gelditu" egin direla diote, hala nola Pinondoko eta San Agustingo zuzkidura-etxebizitzena.
Egoera "paralisian" dagoela eta, koalizioak "lankidetza" eskaini du, herritarrek udal-arduradunen eskumenik ezaren eta borondaterik ezaren ondorioak jasan beharrik izan ez dezaten".