Durangoko Udalak jakinarazi duenez, joan zen zapatuan, hilak 22, ezezagunek 150 kable ostu zituzten Landakoko bidegorri inguruan, atletismo pistaren eta Txibitenako skate parkearen arteko tartean. Udaltzaingoak jaso zuen abisua, eta Durangoko Udalak zerbitzua berrezartzeko lanari ekin behar izan zion albait arinen. Zerbitzua eguenean, hilak 29 berrezarri zuten guztiz.
Durangoko Udalak material berria eta elementu osagarriak erosi behar izan ditu konponketa ahal bezain bizkor egiteko. Era berean, instituzio publikoak herritarren lankidetza eskertu du, eta "irmoki" gaitzetsi ditu gisa horretako ekintza bandalikoak.