Domekan Euskadiko Muay Thai Txapelketak lehiatu ziren Gasteizen eta eskualdeko hainbat borrokalari txapeldun geratu ziren.
Durango Fight Factoryn dabilen Enertz Arrizabalaga Ratonek urrezko domina irabazi zuen 57 kilora arteko kategorian. 17 urte ditu eta abadiñarra da. Apirilaren 12an Euskadiko txapelketa berri bat lehiatuko du Bilbon, K1 modalitatean.
Bestetik, Elorrioko Indar XSport eta Durangoko Laureano Fight Team klubek sei lehiakide eraman zituzten urrezko bost domina eta zilarrezko bat eskuratuz. Urrezko hiru domina kadeteetan heldu ziren Paul Urien eta Bingen Urien durangarrekin eta Sune Larrea elorriarrarekin. Aritz Ispizua eta Marina Valverde durangarrek urrezko domina bana jantzi zuten junior eta senior kategorietan, hurrenez hurren. Azkenik, Oihan Aguirre abadiñarrak zilarrezko domina lortu zuen junior mailan.