Lehenik eta behin lore-eskaintza egin dute Durangoko hilerrian, biktimen oroimenez, eta, ondoren, oroimen-pebeteroa isiotu dute Andra Mariko elizpean. Mireia Elkoroiribe alkateak memoria bizirik mantentzearen garrantzia azpimarratu du: “88 urte igaro badira ere, martxoaren 31k presente jarraitzen du durangar guztien memorian. Ez dugu ahaztu nahi gertatutakoa, gogoratuz bakarrik berma dezakegulako berriro ez gertatzea. Gure betebeharra da historia hori belaunaldi berriei helaraztea”, azaldu du alkateak.
19:30ean bonbardaketako biktimak omentzeko eta gogoratzeko ekitaldia egingo dute Gerediagak eta Kriskitinek, Andra Mariko elizpean. Bertan, Jon Irabazabal omenduko dute, besteak beste.