Materialen eta elementuen uztartzea ere konstante bat izan da bere lanean. "Harria, zura eta burdina material funtsezkoak dira bizitzeko, oinarrizkoak. Gero, ura, airea eta sua elementuak gehitu dizkiet nire lanetan", azaldu du aurkezpenean Lertxundik berak. Bost hamarkada baino gehiagoko ibilbidean, Lertxundik nazioarteko azoka ugaritan erakutsi ditu bere lanak, besteak beste Arco (Espainia), FIA (Venezuela) eta Nicaf (Japonia) azoka ezagunetan. Durangaldean ere hainbat eskultura du; besteak beste, Durangoko Zuhatzola parkean. Hori nahikoa ez, eta, Garazi Arrizabalaga museoaren zuzendariaren berbetan, Lertxundik sarri bisitatzen du eraikina. "Batzuetan erraz egiten dira gauzak, eta honakoa horietarikoa izan da; lekua egitea izan da gatxena", zehaztu du Arrizabalagak.
Poesia errezitaldia
Erakusketaren barruan poesia errezitaldi musikatua ere egingo dutela aurreratu dute prentsaurrekoan, oraindik data zehaztu barik duten arren. Besteak beste, Joseba Sarrionandiak eta Peru Magdalenak parte hartuko dute.