Rio de Orok azaldu duenez, programa oso onuragarria da ume sahararrentzat, eremu horretako uda sasoi gogorretatik urruntzeko aukera eskaintzen die-eta. Era berean, egonaldiak osasuna, elikadura eta ezagutza garatzeko tartea eskaintzen diela gogoratu dute. Eta umeei bakarrik ez: harrera familientzat ere aberasgarria izaten dela azpimarratu dute. Modu honetan zerrendatu dituzte egoera bata eta bestea
Ume sahararrentzat onurak:
- Haien osasun egoera hobetzen dute, bai azterketa medikuak medio, baina baita elikadura egokiari esker ere.
- Errefuxiatu kanpamentuak ez diren beste errealitate bat ezagutzen dute.
- Haien bizitokian ezinezko diren ekintzak egiten dituzte, gaitasun pertsonalak eta etorkizuneko aukerak hobetuz.
- Hizkuntza berri bat (edo bi) ikasten dituzte.
- Lagun berriak egiten dituzte, bizitza osorako.
- Bigarren familia bat dute: lehendabizikoa Saharan, eta berria Euskal Herrian.
Familia euskaldunentzako onurak:
- Familiako kide berri batekin uda ahaztezin bat pasatzen dute.
- Gerora, harreran hartutako haurraren familia ezagutzerakoan kanpamentuetara bidaiatzeko aukera izaten dute, eta haiek ere Saharako bigarren familia bat osatzen dute.
- Familia euskaldunetako haurrak aniztasuna kudeatzen ikasi eta elkartasuna eta enpatia bezalako baloreak lantzen dituzte.
- Errealitate ezberdin bat ezagutu eta kultura berri batekin elkarbizitzen dira.
- Bizitzako egoera ezberdinak beste begi batzuekin begiratzen ikasten dute eta arazoak erlatibizatzen laguntzen die.
- Saharar Herriaren egoera zuzen-zuzenean ezagutzen dute eta haien egoera bidegabearen bozgorailu bihurtzen dira.