Zelan erabaki zenuen motoen osagaiekin dekorazio piezak sortzea?
Beti gustatu izan zait moto eta autoen mundua. Hasieran, zeozer hondatzean tailerrera eramaten nuen. Baina ibilgailu kopuru bat izan nuenean, hondatutakoa neure kabuz konpontzen hasi nintzen. Motoak desmuntatzean, desegiteko ziren pieza batzuei bigarren bizitza bat eman niezaiekeela ikusi nuen. Pistoi bat polita da, motozaleontzat behintzat. Ba, garbiketa prozesu nekezaren ondoren, pistoiak berrerabili eta erlojuak egin ditut, birabarkiekin lanparak, eta su-itzaltzaile bategaz botikina. Esekidura-malgukiekin jesarlekuak egin gura ditut.
Zerikusirik ez duten mundu bi batu dituzu: artea eta motoa.
Bai! Proiektua sortu eta gero, auto klasikoen eta lehiaketako autoen zenbait klub kontaktuan ipini dira, pistoiekin garaikurrak sortzeko aukerez galdetzeko.
Urte hasieran eman zenuen ezagutzera zeure burua.
Giltzatakoekin hasi nintzen, orain hamar bat urte. Niretzat eta ingurukoentzat sortzen nuen.
Sare sozialak erakusleiho handia izan dituzu.
Bai. Sortzeko dudan ahalmena baino askoz ere handiagoa da eskaria momentu honetan. Erantzun izugarria izan dut eta oso pozik nago. Zoriondu egiten naute nire lanagaitik, eta hainbat eskari dut.
Gutxik egingo dituzte halako piezak. Artista ala motozalea zara gehiago?
Artista esango nuke; denerik egin dut. Alabari lau tona pisatzen zuen panpina-etxea egin nion; sei hilean egin nuen. Beti gustatu izan zait sortzea, eguneroko arazoei irtenbidea topatzea. Asko gozatzen dut. Istanbulen (Turkia) antzeko lanak egiten dituen norbait dagoela ikusi dut, eta beste bat AEBetan.
Baina motozalea ere bazara.
Jakina! Betidanik. Lau moto — horietariko bat klasikoa— eta Land Rover klasiko bi ditut. Ezin dezaket esan ez zaidanik gidatzea gustatzen (barrez).
Zer da gehien saltzen duzuna?
Erlojuak eta bihotzak. Pieza bat Alemaniara bidali dut. Batez ere, mediterraneo aldetik ditut eskariak. Ermuko enpresa batek irudi korporatibo lez erabiltzeko pieza eskatu dit, azoketarako.
Zein duzu epe laburrerako erronka?
Produktu-aukera zabaltzea gura nuke, eta pieza ikustean 'zer polita, nork egin du?' galdetzea. Milaka ideia ditut. Motoaren barruko piezek ez dute zerikusirik azken emaitzagaz; lan handia eskatzen du.