Euskara hutsezko ekintza kopurua gutxitu egin da Durangoko jaietan

2022ko datuekin alderatuta, "euskara hutsezko eskaintzak behera egin du, ele bitan egin den eskaintzaren mesedetan. Gaztelaniazko eskaintzak %1 egin du gora, eta euskarazkoa %10 jaitsi da". Berbaro elkarteak ondorio nagusi hori atera du joan berri diren jaietako ekitaldiak neurtu eta gero. Gainera, euskara hutsezko ekitaldien beherakada jaiak antolatzeaz arduratzen diren organo nagusi bien programazioan igarri dute, bai Jai Batzordearen eskaintzan eta baita Txosna Batzordearenean ere. Elkarteak jaietako ehun ekintza behatu ditu, programatu diren ekintza guztien %78, eta datu hauek zehaztu: "Ehun ekintzotatik 43 izan dira euskaraz, 33 ele bitan eta 24 erdaraz". Musikari dagokionez, euskarazko ekitaldiak izan dira nagusi, emanaldien %42 euskara hutsean izan dira eta. Umeentzako ekintzei dagokienez, euskarazko eta erdarazko eskaintza parekoa izan da: ekitaldien %48  euskaraz izan da, eta %43 erdaraz. Antzerki ikuskizunen alorrean, ostera, euskara koska bat beherago dago. Hamar obratatik sei erdaraz izan dira, eta lau euskaraz. Neurketako daturik okerrena barrakek utzi dute beste behin ere. Ipini duten musikan ez da ezer ere entzun euskaraz. %100 izan da erdara, eta datu hori ez da aldatu Berbarok egindako neurketetan. 

Euskara elkarteak Durangoko jaietako ekitaldiak neurtzen dituen hirugarren aldia da. Azterketa 2019an egin zuten lehenengoz, eta orain urte bi egin zuten bigarrena, 2022an. Urte hartan euskararen gorakada "nabarmena" izan zela ondorioztatu zuen Berbarok. Euskara elkarteak beharrezkoa deritzo San Fausto jaietan programatzen diren ekintzen hizkuntzari erreparatzea, "aurrera begira zer hobetu behar den" zehazteko. Era berean, jaien antolaketan parte hartzen duten eragileekin elkarlanean aritzeko prest agertu da.