Durangoko herri galdeketa egin zenetik hiru urte bete direnean, proiektua "herritarrekin erabakitzeko" eskatu dio EH Bilduk gobernu taldeari. Koalizio subiranista "kezkatuta" dago, "EAJk trenaren lurretan altxatu gura duen makro-eraikinaren proposamenagaz". Diotenez, "ez dago" Gaitasun Handiko Osasun Zentroa egiteko "inolako proiektu zehatzik mahai gainean", eta Durangok "ez du beste eraikin erraldoi bat behar". Era berean, gobernu taldeak esku artean daukan proposamenak "berdegunea erdira murriztea" ekarriko lukeela iritzi diote, "erdigunea kotxez betez, aparkaleku eta mugikortasun arazoak areagotuz". Eszenatoki horrek airearen kalitatean eta herritarren bizi kalitatean eragingo lukeela dio EH Bilduk. "Gauzak horrela gure bizitzetan eragin nabarmena izango duten proiektuak herritarrokin erabakitzeko exijitzen diogu udal gobernuari", bukatu dute.