Duranguesa Txirrindularitza Elkarteak 9. Aitor Bugalloren oroimenezko lasterketa antolatuko du domekan. Aurten junior mailakoa izango da.
Lasterketa 15:30ean hasiko da Ezkurdin. 80 kilometroko itzulian hiru bider egingo dute Miotarako joan etorria. Ondoren, birritan igoko dira Goiuriara; lehenengoan Garaitik, eta bigarrenean San Juanetik. Azken igora horretan aldapa gogorrei aurre egingo diete txirrindulari gazteek. Proba 17:45 inguruan amaituko da, Ezkurdin.
Euskadiko talderik gehienek ez ezik Kantabriako eta Madrilgo taldeek ere parte hartuko dute. Tartean, etxeko taldea ariko da: Café Dromedario Flotamet. Guztira, 150 bat txirrindularik ekingo diote Bizkaiko Koparako puntuagarria izango den probari.