Durangoko Alde Zaharra Miguel Gila umorista eta aktoreari buruzko ¿Es el enemigo? filmeko eszenatoki bihurtuko da egunotan.Gaurtik eguenera pelikulako hainbat eszena grabatuko dituzte Pecado Films eta Arcadia Motion ekoiztetxeen proiektuan. Gaur goizean Andra Maria basilika inguruan dabiltza.
Filmak Gilaren bizitza errepasatuko du. Durangoko grabaketa Gilaren Gerra Zibileko kontuetan oinarrituta dago. Orduan 17-18 bat urte zituen eta Madrilen bizi zen. Beraz, filman Madril balitz lez agertuko dira egunotan Durangon grabatutako eszenak, Javier Sanjuan filmeko ekoizpen-buruak azaldu duenez.
Aurreko egunetan Bizkaiko beste hainbat herritan egon dira: Etxebarriko Munibe palazioan, Arabako Karanka herrian… Durangon egon ostean Barazar mendatean eta Burgosko beste toki batzuetan jarraituko dituzte grabaketak.