Durangoko Karrika antzerki taldeak bere 25. urteurrena ospatuko du asteburu bi barru. Urtarrilaren 20a gorriz markatu dute egutegian. Egun horretan ospakizuna egingo dute era batera ala bestera antzerki konpainiaren ondoan egon diren guztiekin. "Asko izan gara Karrikaren bueltan ibili izan garen antzezleak, kideak, ikusleak zein bidelagunak. Asko izan dira sortutako gidoiak, pertsonaiak, ikuskizunak, maskarak eta eszenografiak. Asko izan dira ibilbide honetan izandako bizipenak eta gogora ekarri nahi ditugun anekdotak eta pasarteak", azaldu dute Karrikako kideek ohar batean. Urtarrilaren 20an zer ospatu badutela eta, bertan parte hartzera deitu dituzte Karrikaren komunitateko kideak. Horretarako, info@karrikaantzerkia.eus helbide elektronikora edo 667 923 891 telefono zenbakira deitzeko esan dute. Galara joango direnei soinean zilar koloreko zerbait janztera deitu diete (pajarita, floripondio, kapela zein txal).
Urtarrilaren 20ko ospakizunean honako egitarau hau izango dute:
- 17:30 Topaketa Santa Ana plazan.
- 18:30 Kalejira Durangoko karriketatik.
- 19:30 Urteurren gala San Agustin Kulturgunean. Ostean, brindisa eta luntxa.