Itun horri eskerrak, Durangoko Udalak bere jabetzako etxebizitza bat ipiniko du eskuragarri bazterkeria edo etxegabetasun egoeran herritarrentzat. Eskuragarritasun hori lau urtekoa izango da, eta beste lau urtez luzatzeko aukera eskaintzen du. Erabaki hori Aldundiak martxan daukan Habitat Bizkaia programaren zati da. Administrazio publikoak 30 etxebizitza eskaintzen dizkie etxebakoei, eta aurrerantzean, programa horretara batuko da Durangoko hau.
Teresa Laespada Enplegu, Gizarte Kohesio eta Berdintasun Saileko foru diputatua da, eta Habitat Bizkaia programaren aldeko apustua berretsi du: "2016an pertsona bakarrek erabiltzeko abian jarri ziren 7 etxebizitzetatik 30 etxebizitzetara iritsi da. Programak hazten jarraitzen du". Egunotan, Oscar Secok, Gizarte Inklusioa Sustatzeko zuzendari nagusiak, Durangoko Udaleko Mireia Elkoroiribe alkateak eta Jesica Ruiz alkateordeak Habitat Bizkaia programak Durangon daukan etxebizitzetako bat bisitatu dute.