Mikeldiko Idoloaren lau metroko erreplika egingo dute gaurtik aurrera

Aritz Maldonado 2023ko abe. 4a, 12:58
Luisa Aldaburu, Guillermo Olmo eta Beñat Gaztelurrutia

Basarte Euskal Eskultura Azoka ikusgai egongo da abenduaren 6tik 30era bitartean Durangoko Gandarias Aretoan (Arkotxa, 6); 80 eskultore ingururen 130 lan inguru erakutsi eta salduko dira bertan. "Herri honek gabezia handi bat zuen eskultoreekin; Durangorentzako eta guretzako, azoka hau garrantzitsua da", nabarmendu du Guillermo Olmo Eskuahaldunak elkarteko presidenteak. Horrez gainera, gaur arratsaldean Mikeldiko Idoloaren 4x6 metroko erreplika egiten hasiko dira; egur birziklatuarekin egingo dute. "Elkarlanean egitea da gure asmoa, gaur eta bihar ikasleak etorriko dira, baina horren ostean edozein herritarrek parte hartu dezake; aste honetan zehar amaitzea litzateke gure asmoa", azaldu du Luisa Aldaburu Eskuahaldunak elkarteko Nafarroako ordezkariak. 

Abenduaren 6tik 10era bitartean erakusleiho itzela bihurtuko da Durango, kulturzaleen topagune. Horren jakitun, Basarte Euskal Eskultura Azoka antolatu du Eskuahaldunak Eskultoreen Elkarteak; abenduaren 30era bitartean egongo da Azoka irekita. Besteak beste, Juanjo Abaurrearen, Victor Arrizabalagaren, Rai Bikandiren edota Felix Alanguaren lanak egongo dira. "Gazte jendeak Mikeldiko Idoloa ezagutzea gura dugu, hurbileko ikusi dezatela; horrez gainera, erreplikaren sortze prozesua ere aberasgarria izango delakoan gaude". Hain zuzen ere, Beñat Gaztelurrutia Gerediagako koordinatzaileak Eskuahaldunak elkartearen ekarpena azpimarratu du. "Durangoko Azoka asko aldatu da 58 ediziotan. Hein handi batean, herritarren eta elkarteen ekarpen edo proposamenengatik da. Kasu honetan, azokaren bueltan arte plastikoen hutsunea beteko da", gehitu du. 

Abenduaren 6ik 10era bitartean, 10:00-20:30 bitartean egongo da zabalik Basarte azoka. Gainontzeko egunetan, ordutegi hau izango du: martitzenetik eta barikura bitartean 18:30-20:30 eta zapatuetan, 11:30-13:30 eta 17:30-20:30.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!