Azaroan eta abenduko lehenengo egunetan, Iurreta, Markina-Xemein, Arratzu eta Zallako suhiltzaile-etxeetako txanda guztietako langileek sute-maniobra errealistak egingo dituzte, Durango, Lekeitio, Elantxobe eta Balmasedako hirigune historikoetan. Lau udalerri horiek beren ezaugarriak direla-eta erantzun operatiboan hobekuntzak ezartzeko oinarri gisa erabil daitezkeelako hautatu dituzte, Aldundiak ohar batean informatu duenez.
"Hirigune historikoetako etxebizitza-suteak egoera bereziki konplexuak dira larrialdi-zerbitzuetarako, hainbat faktorek bat egiten baitute: kamioiek sartzeko duten zailtasuna, ur-horniduraren mugak, ekipoekin maniobrak egiteko zailtasuna, eraikin zaharren pilaketagatik etxebizitzen eta eraikinen artean sua zabaltzeko arrisku handiagoa… Horregatik, funtsezkoa da hasiera-hasieratik erantzun efikaza ematea", azaldu dute.
Durango, lehenengo herria
Iurretako suhiltzaile-etxeko suhiltzaileak aste honetan bertan hasi dira maniobrak egiten Durangon. Egunero, astelehenetik larunbatera, etxebizitza-eraikin batean egoera jakin eta desberdin bati aurre egin behar dion txanda batek parte hartuko du. Entrenamenduak suhiltzaile-etxean hasiko dira, eta han hartuko dira lehenengo erabakiak. Ondoren, suhiltzaileak esku hartzeko eremura joango dira, eta maniobra ia bi orduz egingo da, 12: 00etatik 14: 00etara.
Bideoak: www.bizkaia.eus