Durangoko Udalak merkataritza bonuen kanpaina berria aktibatuko du datorren eguenean, azaroaren 2an. Dendetan trukatzeko eta ostalaritzan trukatzeko bonuak, biak, aktibatuko dituzte aldi berean. Herritarrek 10 euroan erosi ahalko dituzte txartelok, gero establezimenduetan 15 eurora arteko kontsumoa egiteko. Bakoitzak 6 txartel eskuratu ahalko ditu gehienez. Udalak 53.400 euro bideratu ditu egitasmora. Herritarrek bonoa.durango.eus atarian edo Turismo Bulegoko (Kurutzesantu), eta HAZ Herritarrentzako Arreta Zerbitzuko kutxazainetan eskuratu ahalko dituzte txartelak.
Jesica Ruiz merkataritza arloko arduradunak kanpaina "funtsezkoa" dela nabarmendu du: "Gure helburua urtero partida ekonomikoak eta Durangoko dendetan erosketak bultzatzen jarraitzeko beharrezkoak diren ekintza berriak onartzea izango da", adierazi du alkateordeak.
Aurreko edizioetan kanpainara atxikita egon ez diren komertzioek, batzeko aukera zabalik dute. Horretarako Turismo Bulegora deitu beharko dute (946033938). Dokumentazioa entregatu beharko dute egoitza elektronikoan. Abenduaren 3ra arteko epea dute horretarako.