Larrasoloeta klubaren ekimenak egin du posible. Durangoko xake klubak bere burua aurkeztu du buruz buruko ligak hartzeko, eta Bizkaiko Xake Federazioak onartu egin du proposamena. Larrasoloetako kideak klubari aupada berri bat emateko lanean dabiltza eta txapelketa Durangora ekartzea ahalegin horren barruan dago.
Buruz buruko liga lau mailatan jokatuko da: Bizkaiko Lehentasunezko Mailatik Hirugarren Mailara arte. Inoiz baino xakelari gehiagok parte hartuko dute, 150 inguruk. Izan ere, aurten arte ligak bitan banatzen ziren, zonaldearen arabera, baina aurten dena bateratzea erabaki dute. Jardunaldi guztiak Landako eskolako frontoian izango dira. Arratsaldean izango dira, 16:30ean hasita. Xakelariek partida bakarra jokatuko dute zapaturo, partida luzeak direlako, hiru-lau ordu ingurukoak.