Auzo etxearen geroaz galdetzera joan zarete agintarien aurrera.
Juan Luis Madariaga: Bai. Kapitanenan auzo etxea egiteko diru partida joan zen martxotik dago onartuta. Proiektua lehiaketa publikora ateratzea baino ez da falta. Eta behin lizitazioa eginda, obrak hastea. Hori dela eta, plenora joatea erabaki genuen, proiektuagaz zer gertatuko den galdetzera.
Gorka Pérez: Bai. Izan ere, proiektu batera bideraturiko diru partida urtebetean gauzatzen ez bada, partida hori beste urtebetez luzatzeko edo altxortegira bueltatzeko arriskua dago. Eta guk ez dugu horrelakorik gura. Proiektua lizitaziora ateratzea eta gauzatzea gura dugu.
Auzoko egunerokotasunari dagokionez, zein arlotan ikusten duzue zentro zibiko baten beharrizana?
G.P.: Faustegoienako etxebizitza berrietara gazteria etorri den arren, ezin dugu ahaztu auzo hau, orokorrean, adin batekoa dela. Jende nagusi asko bizi da. Eta auzo etxeak aukera bat eskainiko die nagusienei, podologia, gimnasia edo osasun kontsulta bat herriko erdigunera joan barik egiteko. Umeei dagokienez, berdin. Etxeak ikasketa gela bat eskainiko du, umeak batzeko leku bat. Azken finean, auzoarentzat onuragarria izango den proiektu bat da zentro zibikoa. Eta hau ez diogu guk bakarrik. Gogoan dut orain 8-10 urte, sasoi hartako gobernu taldeak zentro zibiko erraldoi bat egiteko proiektua zuela mahai gainean. Horrek erakusten du bere garaian beharrizanen bat identifikatu zutela. Udal eraikin bat dela kontuan hartuta, goazen erabilera bat ematera.
San Fausto asko dabil hazten. Etxe berri ugari egin dute. Zelakoa da kohesioa eta auzo bizitza hemen?
G.P.: Faustegoienako etxe berrietara eskualdeko herri askotako jendea etorri da bizitzera. Hasieran ez ziren auzora jaisten. Baina orain bai, hasi dira etortzen. Denboragaz, askok ikusi dute posible dela auzoan sartzea, auzotarrekin nahastea. Horrez gainera, kontuan hartu behar da auzoa asko haziko dela laster. Laminazio fabrika zegoen eremuan etxe ugari egingo dute, auzoaren goialdeko partean ere etxebizitza gehiago egingo dute. Auzoa hazten dabil, jende gehiago egongo da. Horrenbestez, Kapitanenaren moduko proiektuak denontzat izango dira onuragarri.
Juan Jesus Díez: Bai. Gainera kontuan hartu behar da San Fausto, udalerriaren osotasunari begiratuta, biztanleria dentsitaterik handienetariko bat duen eremua dela.
Herriko jai nagusiak ate joka datoz. Zelan biziko dituzue?
G.P.: Bai, jaiak topera biziko ditugu, bai gozamenari dagokionez eta baita lanari dagokionez ere. Jendea auzoan batzea gura dugu. Hemen antolatuko ditugun ekintzekin gozatu dezaten gura dugu. Patxikotxuren kalejira, paella txapelketa, txokolatada, umeentzako jolasak,... arrakastatsuak izango direlakoan gaude.