[EGITARAUA] Durangoko jaietan Karrika Antzerki Taldeak emango dio hasiera Txosnaguneko egitarauari

Durangoko San Fausto jaiak hurreratzen ari dira eta txosna batzordeak txosnaguneko egitaraua aurkeztu zuen atzo arratsaldean.

Aurten ere Landako Gunean kokatuko dituzte txosnak iazko formatu antzerakoan: karpa bi, sukaldea eta eszenatoki handia.

Urriaren 11n, Pantxikerekin batera kalejiran jaitsiko dira txosnagunera eta Karrika Antzerki Taldeak irakurritako pregoiarekin hasiko dituzte jaiak. "Karrikatarrek 25 urtez oholtzetatik herriari eman dioten guztia oholtza bat eta txosnagune oso bat eurei eskainiz eskertu gura diegu", adierazi zuten. Mozorro eguneko gaia 'arte eszenikoak' izango da euren omenez.

Musikari dagokionez estilo anitzetako taldeak ekartzen saiatu dira: Insomnia, Dube, Ezta Ilen eta Nevadah, urriaren 11n; DJ maratoi herrikoia, urriaren 12an; Broken Brothers, Brass Band, Ibil Bedi eta Skabidean, urriaren 13an, eta Nakar, TOC eta Biznaga urriaren 20an, besteak beste.

Eguneko ekintzak ere askotarikoak izango dira: paella txapelketa, gazte eguna... Aurten elkartasun egunak beste itxura bat hartuko du bermuteoa antolatu dutelako urriaren 21erako, KSKA-ren musikarekin.

Azkenik, txosnagunea "espazio segurua" izan dadin eta eraso arrazista, sexista edo LGTBI+ fobikoak ekiditeko protokolo bat martxan egongo dela aurreratu zuten.

19:30 Kalejira Santa Anatik txosnagunera. 
20:00 Txupinazoa Karrika Antzerki Taldearen eskutik.
21:30 Kontzertuak: Insomnia, Dube, Ezta Ilen eta Nevadah.

13:00 Pantxike eta Patxikotxuren jaitsiera udaletxeko txupinazoraino.
21:30 DJ maratoi herrikoia.

12:00 Jolasak txosnagunean haur eta familientzat Berbaroren eskutik.
12:30 Paella txapelketa.
14:00 Sari banaketa.
17:00 Mañaria errekaren jaitsiera Tabiratik. 
18:30 Pinondotik txosnagunera: Broken Brothers eta Brass Band. 
22:00 Ibil Bedi eta Skabidean. 

12:00 Kamiseta banaketa Santa Anan.
14:30 Bazkaria.
17:00 Kirol txapelketen finalak eta bazkalosteko jolasak.
19:30 Mauxitxa txaranga txosnagunetik hasita.
17:30 Poteo transmaribibolloa Pinondotik txosnagunera, Kuir Eztanda.
22:00 DJak: Les Sauvage MJ eta DJ Eromena.

18:00 Terrazeo girotua.
19:00 Tortilla txapelketa.
20:30 Sari banaketa.
22:00 Nakar, TOC eta Biznaga. 

Mozorrotzeko gaia: arte eszenikoak.

13:00 Elkartasun bermut musikatua. KSKA kolektiboaren musikak girotua.
22:00 Sound System. Aiaraldeko soinu sistema.