Durangoko atletismo pistak hitzordu garrantzitsu bi hartu zituen joan zen asteburuan: Euskadiko Master Txapelketa, zapatuan, eta Espainiako Bigarren Mailako kluben arteko txapelketako jardunaldia, domekan. Durango Kirol Taldeko (DKT) Nuria Etxegaraik bietan parte hartu zuen eta emaitza bikainak lortu zituen. Etxegarai Mungiarra da jaiotzez, baina lotura estua dauka Durangaldearekin: DKTgaz Durangon entrenatzeaz gainera, Berrizen lan egiten du.
Zapatuan, 2.000 metrotako oztopo proban eta 50 urtetik gorako kategorian aritu zen eta Espainiako errekorra hobetu zuen. Marka berria honako hau da: 7.55.6. Hurrengo egunean, berriz, bigarren geratu zen 3.000 metrotan.
Zapatu honetan, gizonen txanda
Zapatu honetan gizonen txanda izango da, berriro ere Durangoko atletismo pistan. DKTko gizonak Lehenengo Mailan dabiltza eta ez jaistea dute helburu. Horretarako azkenengo postu biak ekidin behar dituzte. Horretan saiatuko dira Eneko Lambarri, Imanol Aiartzaguena, Paul Ubierna eta enparauak.