Oier Guillan aktoreak, Leire Vargas idazleak, Jon Maya dantzariak, Arantza Arrazola San Agustin kulturguneko zuzendariak, Aurelie Pousset Hendaiako kultur programatzaileak eta Gerediaga elkarteko Asun Elorriagak osatutako epaimahaiak proiektuak "lehen kolpean emandako ezustea" azpimarratu du. "Eukaliptoaren zabalkundearen metaforarekin harilkatu ditu egileak gogoeta berean monokultiboa, faxismoa, eta egun gure jendarteak kolpatzen dituzten kezka sozialak eta erronkak. Hain zuzen ere, planteamenduak guregan sortu duen mugimendu hori publikoarengan sortu lezakeelakoan gaude. Funtsean, gaiaren originaltasunak arrastoa utzi digu: eukaliptusari emandako balio metaforiko aberatsak, eta bertatik abiatuta gaurkotasunari lotutako hainbat gai jorratzeko testuingurua sortzeko gaitasunak".
Jon Ander urresti Dantzerti Arte Eszenikoen Goi Mailako Eskolan graduatua da eta hainbat antzerki taldetan aktore lanetan ibili da. Hain zuzen ere, proiektu honetan dantza eta antzerkia uztartu gura ditu, lehena abstrakziorako erraminta lez, eta bigarrena, ostera, konkreziorako.