[BIDEOA]: Salmenta makina bat kalean, eskolako menuak behar dituenari doan helarazteko

Ekaitz Herrera 2022ko aza. 17a, 14:19
Deskargatu Info Ahotsak :

Jesuitak ikastetxeko ikasleek proiektu berri bat sortu dute eskolako jantokian egunero-egunero zerbitzatu barik geratzen diren menuei irtenbide solidario bat eman eta janaria botatzea ekiditeko. Proiektuak Janariprest du izena, eta makina martxan dago jada.

Elkartasuna lantzea hondakin kopurua gutxitzen den bitartean. Posible da? Jesuitak ikastetxeko ikasleek, behintzat, bide horri heldu diote. Datu batetik abiatu dute dena: ikastetxeko jantokian 650 bat menu ematen dituzte egunero-egunero, baina euretariko batzuk zerbitzatu barik geratzen dira. %5 inguru. Hori dela eta, salmenta makina bat ipini dute Kurutziaga kalean, beharrizana daukanak bertatik menuak debalde eskuratzeko aukera izan dezan. Norabide biko proiektua egin dute horrenbestez. Janaria alferrik galtzea eragozten dute batetik, eta beharrizana duenari laguntzea lortzen dute bestetik. Ikasleak arduratuko dira zerbitzua kudeatzeaz, eta bidelagun izango dituzte beste hainbat eragile. Tartean, Residuos Cero Fundazioa, Ausolan elikadura enpresa eta Durangoko Udala.

Proiektuaren funtzionamendua sinplea da. Batetik, kontsumitu barik geratu diren menuak ontzi konpostagarrietan ontziratuko dituzte, tenperatura prozesu ziur bat jarraituta. Ausolan enpresako kideak arduratuko dira horretaz, eskolako sukaldean lan egiten duten beharginekin elkarlanean. Behin hori eginda, ikasleen txanda izango da. Ontziak behar den moduan etiketatzeaz, garraiatzeaz eta edukiaren iraungipena zaintzeaz arduratuko dira. Eurak izango dira ontziak Kurutziaga kaleko makinan ipiniko dituztenak. Azkenik, ontziak dagokionari helduaraztea izango da erronka. Jesuitak ikastetxeko kideek adierazi dute "beharrizana duen edozeinek doan eta gura duenean", eskuratu ahal izango duela jatekoa. Alfredo Sarriugarte zuzendariak, hain zuzen ere, azpimarra berezia egin dio puntu horri. Makina "kontzientziaz" eta "zentzuz" erabiltzea eskatu du, egoera zaurgarrian dauden herritarrak baitira proiektuaren helmuga.
 

Ikasleak boluntario

Makina egunero-egunero betetzeaz eta gainbegiratzeaz ikastetxeko ikasle talde bat arduratuko da. Alba Gómez da euretariko bat. "Gazteak gara eta gure laguntza eskaini gura dugu boluntario lez. Ontziratutako elikagaiak makinan sartu, garraiatu eta iraungitze data kontrolatuko dugu", adierazi du. Ima Garrastatxu alkateak proiektuaren elkartasun balioak goraipatu ditu. "Pozgarria, polita eta interesgarria da proiektua, eta azpimarragarria iruditzen zait gazteengandik sortutako zerbait dela. Oso garrantzitsua da elkartasuna, komunitatea sortzea. Durangoko Udala beti egongo da horrelako proiektuak laguntzeko prest", esan du. Udalak urtebeteko konpromisoa hartu du proiektua bultzatzeko. 8.000 euro bideratuko dituzte egitasmora. 

Proiektuan esku hartzen duen beste eragile bat Residuos Cero fundazioa da. Álvaro Saiz jakinarazi du uneoro izango dutela makinan gertatzen dabilenaren berri. "Elikagaiak zein tenperaturatan dauden, zer hartzen den, zenbat lehenengo eta bigarren plater hartzen diren. Monitarizazioa inportantea da janaria alferrik galtzea ekiditeko. Batez beste, menuen %10 zerbitzatu barik geratzen dira, Jesuiten kasuan %5era jaisten da kopurua", adierazi du. Residuos Cero Fundazioak beste hiru proiektutan esku hartzen du Durangokoaz gainera. Etxebarrin, Azpeitian eta Hernanin. Ausolan enpresako kideentzat, bestalde, eskola sukalde batean halako zerbait egiten duten lehenengo aldia izango da. Monika Cabo arduradunarentzat "erronka handia" da proiektua, jatekora barik hondakinak gutxitzeari begirakoa ere badelako. 

Gizartea Durango
ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!