Orain arte Tabiran jokaturiko partiduetako datuak ez dira onak: hiru porrot eta garaipen bat. Etxetik kanpora hobeto dabiltza, jokaturiko partiduen erdiak irabazita. Asteburuan aukera ona dute estatistika hori hobetzeko, Aurrera de Vitoria azken sailkatuaren zelaia bisitatuko dute eta. Gasteizko taldeak etxean jokaturiko lau partiduak galdu ditu. Garaipen bategaz, lehenengo zazpi sailkatuen artean mantenduko litzateke Durangoko kluba.
Ohorezko Mailan, ezinean
Maila bat beherago, Bizkaiko Ohorezko Mailan, oraingoz nahi eta ezinean dabiltza eskualdeko hiru ordezkariak. Iurretako dago hiruretatik ondoen kokatuta, jaitsieratik puntu bira. Elorrio eta Abadiño, ostera, jaitsiera postuetan daude berriro. Azken horrek, Abadiñok, joan zen denboraldian lortu zuen Lehentasunezko Mailatik Ohorezko Mailara igotzea.