Gurdi ibiltari bat, armairu ibiltari bat eta herritarrak armairu horren “barrutik” irteteko ekintzak. Hori guztia eta gehiago musika dosi apur batekin eta purpurina dosi askorekin. Durangoko LGTBIQ+ komunitateko kide batzuek Kuir Eztanda egin dute gaur. Kalera atera dituzte ostadar koloreko aldarrikapenak. “Sexiliora” jo beharrik barik, sexualitatea, generoa eta identitatea herrian bertan bizitzea aldarrikatu dute. Karropoteoak Pinondotik irten du 18:00ak pasatxotan. Goienkalen sartuta, jendetza batu da bertara. Taldeak “geratzeko etorri” dela esan du. “Arau zisheterosexuala eztandaraztera” deitu dute.