Ruben Ramos kartelaren egileak sorkuntzaren eta jaiaren eztanda irudikatu du kartelean. "Ilustrazioak unibertsoaren eta Bing Bangaren hedapenera eramaten gaitu. Inklusibitatearen baitan, pertsona ezberdinen, ez emakume ez gizon, ideiak, ilusioak eta norberaren imaginazio koloreduna irudikatu dut. Kulturak berak, bai literatura, bai musika, beste leku batera eramaten gaituenaren isla da. Kolore paletak eta ikonografiak sintetizadore retroetatik edaten dute, eskuz landutako tipografia psikodelikoarekin", azaldu du Ramosek kartelaren aurkezpenean. Ibilbide luzeko diseinatzaile eta sortzailea da Ramos, eta azken urteetan hainbat kanpainatan lan egin du: Zinemaldia, Jazzaldia, Loreak mendian... Oraintsu Aise Studioa sortu du.
Ohiko guneak
Azken urteetako guneak zabalik egongo direla iragarri dute prentsaurrekoan, baita Plateruena ere. Horrez gainera, aurrez aurreko azoka "ohi bezalakoa" berreskuratzeaz gainera, online denda ere martxan egongo da aurten.
Gaurko prentsaurrekoan Nerea Mujikaz eta Ruben Ramosez gainera, Antoni Iturbe (Eusko Jaurlaritzako kultura sailburuordea), Xabier Arauzo (Bizkaiko Foru Aldundiko euskara zuzendari nagusia) eta Ima Garrastatxu Durangoko alkateak hartu dute berba.