Durangoko EAJk udaltzaingoaren egoitza berritzeko lanak "hiru hilabete eta erdiko" atzerapenagaz datozela eta 75.000 euroko gainkostuagaz datozela kritikatu du. Jeltzaleek ohar batean adierazi dutenez, horren arrazoia obraren jatorrizko proiektuan legoke, "hasierako proiektuan ez baitziren aireztapen-instalazioak behar bezala jasotzen". Gaineratu dutenez, obrak etenda egon dira urtarrilaren 31tik eta horrek herritarrei eragin die, "askok zailtasunak" izan dituztelako behin-behineko instalazioetara ailegatzeko.
Durangoko Udalak udaltzaingoaren egoitza berritzeko lanak hasi zituen iazko irailean. Lanek iraun bitartean, behin-behinean, polizia-etxea Landako Gunearen ondora lekualdatu zuten. Momentu honetan han dago Durangoko udaltzaingoa. Jeltzaleek "erabaki egokiagoak" hartzeko eskaria egin diote gobernu taldeari.